GRABENG naangol ang usa ka drayber lakip ang apo niini human aksidenteng nibangga ang tri-cab nga ilang gisakyan sa usa ka awto nga naka-parking didto sa Burgos Street, Barangay Poblacion I, siyudad sa Tagbilaran niadtong Huwebes mga alas 8:15 sa buntag.
Ang mga biktima giila nga si Noel Ayzar, 55 anyos, minyo ug Maureen Castaño, 15, nga babayeng apo niini, pulos lumolupyo sa Brgy. Mayacabac, lungsod sa Dauis.
Sigun sa taho nga samtang ang biktima nagmaneho sa iyang TVS tricab kolor green nga may body number 095 uban ang iyang apo kinsa iyang gihatud unta sa Dr. Cecilio Putong National High School. Nagdagan gikan sa lungsod sa Dauis paingon sa Tagbilaran City Proper, dihang pag-abot sa maong dapit atbang sa Angel’s Burger, kalit lamang nibangga sa likod nga bahin sa usa ka Toyota Corolla kolor puti nga may plaka XFB- 472 nga gipanag-iyahan ni Fudalino Boyboy nga giparking kilid sa karsada atubangan sa balay sa tag-iya sa sakyanan.
“Mura’g nakatulog ning drayber sa tricab kay straight man ang karsada, ” butyag ni PSSg Giovanne Doydoy sa traffic section sa Tagbilaran City Police Station.
Matud ni Doydoy nga grabeng naangol ang tuong paa sa maong drayber samtang nangapangos ang lawas sa apo niini. Ug pulos gidala sa Gov. Celestino Gallares Memorial Hospital sa siyudad.
Dugang niya nga tungod sa kakusog sa impact sa pagkabangga, nadanyos ang ilkod nga bahin sa maong awto ug ang front bumper sa nasampit nga tricab. (ALAN ANDY NALZARO DALAGAN)
