USA ka van for hire aksidenteng nabanggaan og usa ka multicab nga nitabok sa nasudnong dalan didto sa Brgy. Canmanico, lungsod sa Valencia mga alas 10:50 sa buntag kagahapon.
Sigun ni PSSg Urcel Cristal sa Valencia Municipal Police Station nga samtang ang Suzuki double cab kolor blue nga gimanehoan ni John Mark dela Cruz, 39 anyos, ulitawo, may live-in partner, lumad nga taga Brgy Poblacion lungsod sa Danao giparking sa daplin sa karsada. Dihang mitabok kini padung mosud sa nasudnong dalan, nataymingan kini nga niagi ang usa ka Ceres bus hinungdan nga nibangga sa Nissan van for hire nga may plaka ABN-4321, gimanehoan ni Felix Ladao y Cacayan, 34, minyo, taga Brgy. Calabacita, lungsod sa Jagna nga nagdagan gikan sa siyudad sa Tagbilaran padung sa Jagna.
“Dihay nilabay nga Ceres, wa kakita ang drayber sa multicab sa van, ” butyag ni Cristal.
Matud ni Cristal nga nalumping ang atubangan nga bahin sa van samtang nabuak ang windshield sa maong multicab.
Way gikatahong dunay naangol sa maong hitabo.
Dugang ni Cristal nga nagka-settle ang duha ka panig. (ALAN ANDY NALZARO DALAGAN)
