MANILA – Dihang nakahukom ko nga undangon na ang akong pagserbisyo isip usa ka peryodista niadtong 2007, wa koy pagduha-duha nga mao na to ang katapusan tungod kay lahi na usab ang akong tutokan.
Di sayon ug di lalim ang kinabuhi isip usa ka peryodista ilabina isip usa ka koresponsal sa usa ka higante nga pamantalaan. Tungod sa kultura sa trabaho, lakip sa mabikil ang imong mga suod sa kinabuhi.
Sud sa 22 kinabuhi, way kasigurohan ang kalihukan sa usa ka adlaw. Di tingali sa kaseryoso nga duna gyuy hulga sa kinabuhi (usahay hinoon duna gyud pud) apan kon matuman ba ang plano nga giandam sa usa ka adlaw.
Wa na ko katimaan ug pila ka higayon nga molupad sa hangin ang giandam nga mga kalihukan tungod kay dunay mobuto nga dagkung panghitabo nga kinahanglang tutokan ug suwaton.
Mao nga sa mga panahon nga nagpasilong ug nahipos ang ubang mga tawo sud sa ilang panimalay o bisan asang dapit nga luwas sila, mao usab ni panahon nga kinahanglang mogawas ang usa ka magsisibya.
Sa panahon sa katalagman sama sa bagyo, unos, baha, linog ug uban pa makasiguro ka nga dunay sakop sa media nga nagtutok niini kung wa man galing sa nahinabuan mismo. Human sa ambush, patay, tulis, kawat, budol ug uban pa, dunay moabot nga tigbalita sa di madugay.
Kinahanglan nga mahinabi ang mga saksi sa kaso nga dunay patay ug mga biktima mismo kung buhi kini. Pasagdi na lang ng mga anomaliya kay makahuwat man kung kanus-a malugaran ug suwat.
Di na lang ta maghisgut sa mga hulga, insulto, biaybiay, intriga, paghugaw-hugaw kay masinati kini di lang sa sakop sa prensa apan sa bisan unsang matang sa panginabuhi. Bisan pa gani ug di gyud mogawas sa bay ang usa ka tawo, di kini makalikay sa mga hugaw nga hunahuna sa mga intrigador.
Kini ug uban pang mga kasinatian igo na nga makabun-og ug makabugnaw alang niining maong matang sa trabaho paglabay sa daghang mga katuigan. Mao nga samtang daghan ang magpadayon hangtud sa katapusan, nakahukom ko nga magpalain na pud.
Di tingali ni maoy nisantop sa akong hunahuna apan mahimo kining gamiton aron paglarawan sa akong gibati: usob pay layog.
Apan karon, tunlon ang garbo sa pag-ingon nga di gyud diay maayo nga mag-una. Sama sa kanunay natong madunggan: way siguro sa koros.
