POBLACION, Trinidad — PATAY ng nahidangat sa tambalanan ang usa ka working student human nibangga sa Ceres bus alas 4 pasado sa hapon kaniadtong Martes, Disyembre 13 sa Sitio Pandayan, Purok 4 (eskina padulong Napocor) niining maong lungsod.
Ang biktima naila nga si Roberto Cañete, 21 anyos, working student, graduating sa K-12, usa ka sakop sa Akhro, taga-Purok 3, barangay M. Roxas sa maong lungsod.
Nagtungha ang biktima sa Hinlayagan National High School, barangay Hinlayagan, Trinidad.
Suma sa mga saksi nga nahinabi niining tigbalita, nagdagan padulong sa Poblacion ang maong biktima sakay sa iyang itom nga smash nga motor sa dihang nikawat kini og dalan sa maong lugar ug naatlan nga ang Ceres bus nagdagan usab sa nahitaboan paingon sa siyudad sa Tagbilaran.
Tungod sa kakusog sa impak, nikagay ang motorsiklo sa biktima, nabuak ang tuong suga ug niliki ang tuong bahin sa wind shield sa Ceres bus nga may body #12163 ug plate #AAY5601.
Sa kakusog sa dagan sa biktima nga walay helmet, dako ang kadaot nga naporma sa agtang ug nawong ang niini.
Giingon usab nga ilawom sa impluwensya sa makahubog nga ilimnon ang biktima.
Sa kuha sa CCTV sa maong lugar, nga gipasa sa usa ka concerned citizen niining tigbalita aron matubag ang mga pangutana kon kinsa’y sayop, makita nga sayop gayud sa biktima.
Gisuwayan pa kini og dala sa Garcia Memorial Provincial Hospital sa Talibon sa mga niresponde apan gibawian sa hinuwamang kinabuhi. Wilson Auguis Subrio/ (ALAN ANDY NALZARO DALAGAN)
