Ang hugpong sa mananayaw sa barangay Yanangan, Loay, Bohol mao ang nahimong kampeyon sa Sambat Mascara y Regatta street dance competition and showdown in free interpretation, matud ni Mayor Atty. Boyet Ayuban sa iyang facebook post.
Nahakot usab sa Yanangan ang ganti isip “Best in Musicality,” ug “Best in Costume.”
Ang naasoyng bangga sa sayaw sa kalsada usa sa mga kalihokan sa Loay sa ilang pagsaulog karong tuiga sa ikaduhang patron sa lungsod, San Francisco Xavier human sa duha ka tuig sa pandemic.
Ang kombinasyon sa barangay Calvario ug Palo nagdaog sa first runner-up; Tayong Occidental ug Tayong Oriental, second runner-up; Tambangan, third runner-up; ug Agape, fourth runner-up.
Ang hugpong sa mananayaw sa barangay Bonbon, Hinawanan ug Concepcion mao ang nagdaog sa “Best in Street Dancing” ug P10,000 nga premyo.
Ang Yanangan gipremyohan sa P50,000; Calvario ug Palo, P40,000; Tayong Occidental ug Tayong Oriental, P35,000; Tambangan, P30,000; ug Agape, P25,000.
Sa adlawng Biyernes (Dec. 2, 2022) gibuksan ang Agri-Fair sa hawanan/atubangan sa simbahan sa Loay, diin gihimo ang “showdown” sa mga mananayaw gikan sa kabaryohan.
Sila si Board Member Tita V. Baja, nag-representar ni Gov. Aris Aumentado ug nahimong acting gobernadora niadtong higayona, uban nila ni Mayor Ayuban, BMs Greg Jala, Dr. Elpidio Bonita ug Atan Binlod, Padre Lionil Grado, Atty. Glen Anino nag-representar ni Bise-Gov. Victor Balite, Loay Kagawads Ondoy Adiong nagbukas niini sa usa ka programa uban ni Bong Bullecer, isip master of ceremonies.
Gilusad usab ang ubang mga kalihokan, sama sa “Fun Run,” Fluvial parade, Barbecue sa Boulevard, Food Fusion ug bangga sa “Individual Maskara.” (rvo)
