Namahayag si DSWD Sec. Erwin Tulfo nga iapil nila ang P1B Odette aid alang sa Bohol sa 2023 budget deliberations.
“1B Odette aid for Bohol iapil sa 2023 budget deliberations” , suma pa ni Sec. Tulfo.
Dugang pa niya nga saad kini sa kanhi namunuan sa nasud ug angayan lamang nga tumanon kini sa kasamtangang administrasyon.
Ang pundo nga nahabilin karong tuiga gigahin na alang sa programang AICS ug Educational Assistance.
Matud pa sa DSWD Secretary nga makalaum ang mga Bol-anon nga walay kolor sa pamolitika ang pagpanghatag sa bisan unsang ayuda gikan sa ilang ahensya.
Nahidangat si Sec. Tulfo dinhi sa Bohol alang sa Turnover Ceremony sa P19, 967,997.90 nga Isolation Facility nga kompleto sa mga Medical Tools, Amenities ug mga ekipo didto sa Poblacion, Pilar.
Laing turnover ceremony ang gipahigayon sa Brgy. Estaca alang sa 2-classroom building gikan sa maong ahensya.
Mainiton silang gidawat ni Pilar Mayor Wilson Pajo, Bise Mayor Eugenio Datahan II ug mga konsehales.
Nitambong usab ang mga kapitan sa mga barangay alang sa mga sub-projects nga nahatag sa DSWD kanila.
Wala nagpaulahi sa paghatag suporta ang kagamhanang Probinsyal nga gipangulohan ni Gov. Erico Aristotle Aumentado ug Bise Gob. Dionisio Victor A. Balite,Ph.D. (Kahlil Lester O. Camba)
Hulagway gikan sa inquirer.net
