DUHA ka mga traysikol drayber nireklamo sa kapolisan human giingong gituok sa usa ka traffic enforcer didto sa Gallares Street duol BIT, siyudad sa Tagbilaran mga alas 9:45 sa buntag niadtong Lunes.
Ang mga reklamante giila nga sila si Jeffrey Ayeng, 43 anyos, minyo, residente sa Purok-7, New Lourdes, Cortes, Bohol ug Marlon Gabi, 33, ulitawo, taga Candait drive, Brgy. Bool, Tagbilaran.
Ang suspetsado nailhan nga si Eque Macarson, hamtong ang pangedaron.
Sigun sa taho nga samtang si Ayeng nagpakanaug sa usa sa iyang estudyante diha sa BIT. Dihang niduol ang maong traffic enforcer ug gipangayoan og driver’s license. Ug niingon si Ayeng nga “nakadistorbo ka ug nakatraffic ka, unsa may akong violation nga igo raman kong ni-drop og estudyante”. Niingon ang traffic enforcer nga mga isog mo ug dayong tuok sa maong biktima. Ug nagpabilin kini og lakra sa liog tungod sa kahugot niini nagisi usab ang iyang sinina.
Samtang si Gabi, gilughitan usab sa iyang liog gamit ang kamot tungod kay siya usab ang nagsunod niini.
Padayon pang gisundan sa kapolisan ang maong hitabo. ( ALAN ANDY NALZARO DALAGAN )
