GRABENG naangol ang usa ka tres anyos nga batang lalaki human aksidenteng nabanggaan sa duha ka mga motorsiklo didto sa Mokpok Norte Sandingan, lungsod sa Loon niadtong nakalabay nga adlaw.
Ang biktima giila nga si French Mark Jagunos, lumad sa Brgy. Del Rosario, Balilihan.
Sigun sa taho nga ang biktima kauban sa mga ginikanan niini niadto sa maong dapit Kay didto magsaulog sa adlaw nga natawhan niini.
Pagka alas 7:00 sa gabii ang biktima kalit nidagan kuyog sa iyang kaubang mga bata ug nitabok sa barangay road sa maong dapit hinungdan nga aksidenteng nabanggaan sa usa ka motorsiklo nga gimanehoan ni Danilo Emblante, 48, lumad nga lumolupyo sa maong lugar. Pagkatumba sa biktima wa nakabantay ang laing motor nga gimanehoan ni Jeef Ericson, 18, kinsa nagsunod ni Emblante hinungdan nga natapsingan usab ang maong bata.
Nahiagom ang biktima og angol sa ulo niini ug daling gihatud didto sa Gov. Celestino Gallares Memorial Hospital. ( ALAN ANDY NALZARO DALAGAN )
