LIMA ka mga tawo ang nangaangol human usa ka 10-wheeler delivery wing van truck sa Shoppers Mart nakabagat og disgrasya dihang nawad-an og brake sa nasudnong dalan didto sa Sitio Curvada, Barangay La Hacienda, lungsod sa Alicia mga alas 10:30 sa buntag kagahapon.
Sigun ni PSSG Ruther Jayoma sa Alicia Municipal Police Station nga samtang ang Fuso Delivery wing van truck nga gikargahan og mga sinakong feeds ug mga grocery goods, gimanehoan ni Jaime Binlod, 51 anyos, minyo, molupyo Brgy. Bicao, lungsod sa Carmen. Nagdagan gikan sa lungsod sa Carmen padung sa direksiyon sa lungsod sa Alicia ug Mabini. Dihang pag-abot sa maong dapit, giingong nawad-an og brake ang sakyanan hinungdan nga gibangga sa walang bahin sa karsada sa maong drayber ug aksidenteng nahug sa kanal.
“Nakahukom ang drayber nga ibangga sa left side kay way mga balay,” butyag ni Jayoma .
Gumikan sa hitabo, nahiagom og mga minor nga mga angol ang maong drayber lakip ang mga pahinante nga sila si Samuel Luna, 27, ulitawo, taga Brgy. San Roque, Cortes, Bohol, Steven Sellan, 22, ulitawo, taga lungsod sa Inabanga, Jonathan Maldona, 31, minyo, taga siyudad sa Tagbilaran ug ang checker nga si Melanie Samar, hamtong ang panuigon, molupyo sa Tagbilaran.
Pulos gihatud ang mga biktima sa Rural Health Unit sa maong dapit.
Samtang nadanyos ang aluminum cover sa maong sakyanan. (ALAN ANDY NALZARO DALAGAN)
