Ang pagka-politiko maoy usa sa pinaka-komplikado nga trabaho kon mosulod sa pang-gobyerno.
Ug hangtud karon mao gihapon ang sistema sa politika. Gubot kaayo.
Ang mga hulga sa kinabuhi batok sa mga politiko dili gayud mawala.
Sa pagka-moderno sa panahon, nagka-moderno usab ang paagi sa pagpaabot sa hulga. Pinaagi na sa social media, tawag o text. Apan ana-a gihapon ang death threat pinaagi sa sulat nga may pakapin nga bala.
Dinhi sa Bohol, anaay usa ka mayor sa lungsod nga giingong gihulga sa makadaghang higayon sukad pa sa panahon sa Eleksyon kaniadtong Mayo.
Ang karibal sa politika giingong gihulga usab. Apan giingong mas kuyaw ang hulga batok sa mayor.
Kining istoryaha nigawas na sa social media sama sa Facebook, radyo ug mga pamantalaan. Public knowledge na kini.
Ana-a ang simpatiya sa katawhan ngadto sa mayor nga gihulga.
Apan ang gidudahang maoy utok sa pagpanghulga, ana-a usab depensa nga tinumo-tumo ra kuno ang giingon sa mayor aron maoy mogawas nga biktima.
Ang bugtong nakahibalo sa tinuod nga panghitabo mao ra ang duha ka pundok nga nagtinudloay kon kinsa ang naghimo sa pagpanghulga.
Ang kuyaw lang sa maong isyu kon anaay mga kinabuhi nga maamong kon mosamot ang tensyon tali nila.
Gubot gayud ang kalibutan sa politika. Ug kon dili kaya ang kainit niini, mas maayo pa nga mo-undang o dili na lang magpatuga-tuga og sulod niini.
Hinumduman unta nila nga ang pagsulod sa politika usa ka halangdong trabaho — moalagad sa katawhan. Ipatigbabaw ang kahapsay ug kalinaw kaysa kagubot, garbo ug kahigutgot.
![](https://i0.wp.com/boholbalita.com/wp-content/uploads/2022/08/297250573_5616130511770268_6935859902824866874_n-scaled.jpg?fit=1024%2C450&ssl=1)