Gibasura sa Regional Trial Court Branch 101 ang lima (5) ka ihap sa kasong Cyber Libel samtang gihukman nga sad-an sa unjust vexation ang magsusuwat sa Bohol Balita Daily News sa hukom nga gipirmahan ni Presiding Judge Azucena C. Macalolot-Credo kaniadtong November 3, 2022.
Naluwas sa penalidad sa lima ka kasong cyber libel si Wilson Auguis Subrio human sa hukom nga ACQUITTAL pabor kaniya tungod sa pakyas nga pagprobar sa prosecution nga siya sad-an “beyond reasonable doubt” sa gisang-at nga mga kaso, samtang gihukman siyang sad-an sa 4 ka ihap sa Unjust Vexation in Relation to R.A. 10175 ug penalidad nga tag P5,000 matag usa nga moabot og P20,000 sa upat ka kaso.
Ang batan-ong magsusuwat nga si Subrio kinsa regular nga magsusuwat sa Bohol Balita, kolumnista ug tigsuwat sa BBDN editorial, nag-atubang sa cyber libel cases tungod sa iyang mga sinuwat nga giingong gipatik sa iyang Facebook Account nga nagpadayag sa iyang mga opinyon sa pamunoan sa lungsod sa Trinidad nga may relasyon sa iyang pagka papas sa iyang pag-tungha sa Trinidad Municipal College ug sa eleksiyong lokal sa tuig 2019.
Matod pa sa hukom sa korte, “From an examination of the fb posts in the account Wilson Auguis Subrio, and read in its entirety, the Court finds that such posts were donating disgust and displeasure, on an event or on specific persons, rather than as defamation.” “It must be stressed that words which are merely insulting are not actionable as libel or slander per se, and mere words of general abuse however opprobrious, ill-natured or vexatious, whether written or spoken, do not constitute a basis for an action for damages. The Fact that the language is offensive to the plaintiff does not make it actionable by itself.” “Mere vulgar abuse is an insult that is not necessarily defamatory because it is not intended to be taken literally or likely to cause real damage to a reputation.”
Sa pakighinabi, si Subrio niingon nga nalipay siya ug ang iyang pamilya sa hukom sa korte nga siya way sala sa cyber libel ug niingon nga atubangon niya ang penalidad sa laing upat ka kaso nga pagmulta sa kantidad nga P20,000.00.
Ang mga kaso nitumaw tungod sa reklamo sa magtiayong Atty. Roberto Cajes ug sa iyang kapikas nga kanhi Mayor sa lungsod sa Trinidad Judith del Rosario Cajes batok kang Subrio tungod sa sunod-sunod nga pagpost sa iyang Facebook account.
Ang mga kasong cyber libel mao ang Crim. Case No. 20-5179 tungod sa post kaniadtong May 7, 2019; Crim. Case no. 20-5180 sa fb post sa petsa May 8, 2019; Crim. Case No. 20-5181 sa post kaniadtong May 9, 2021; Crim. Case No. 20-5182 sa posts kaniadtong May 13, 2019 ug Crim Case No. 20-5183 sa iyang FB post kaniadtong May 16, 2021.
Samtang ang mga kasong Unjust Vexation In Relation to R.A. 10175 gimarkahan og Crim Case No. 20-5184 ngadto sa 20-5187.
Si Subrio gilabanan ni Atty. Bryn D. Pelandas, ang usa sa mga legal counsels sa Bohol Balita Newspaper. (jgo)
