Taliwala sa bahad sa NPA dinhi sa Bohol ngadto sa armadong kusog nga anaay mahitabong engkwentro sa mosunod nga mga tuig, ang amahan sa mga Bol-anon nga si Gob. Aris Aumentado, nagpaka-amahan.
Sa taho nga nigawas, niingon si Gob. Aumentado nga dili kontra sa mga rebelde ang gobyerno kay andam kining motabang nila.
Punto ni Aris, nga kon unsa may mga problema ilabina sa dugay ng katuigan, angay istoryahan og tarong, aron kini maresolbar. Dili solusyon ang armas ug ang pagbinasulay.
Gipasabot usab sa gobernador nga biyaan na ang sayop nga mga pagtuo o gipakigbisugan (ideyolohiya) sa maong grupo.
Iyang gi-rason nga sayang ang kinabuhi kon magpadayon sila.
Mas nindot ang kinabuhi nga dili magtago-tago ug makabaton og tarong nga pamuyo nga luwas sa kakuyaw.
Hinuon, dili usab ikalimod nga daghan ang nihawa sa sabakan sa gobyerno tungod sa bati nga pamalaod, inhustisya, korapsyon ug ubang pa’ng dautang binuhatan nga nahimo sa mga opisyales sa gobyerno, pinili man o tinudlo.
Apan isip mga Bol-anon nga gusto og kahapsay ug kalinaw, istoryahan og tarong ang mga isyu. Kay ang administrasyong Aumentado naningkamot nga mapapas ilabina ang korapsyon sa Kapitolyo, ug kini iyang mahimo kon magkahiusa ang katawhan.
