TAGBILARAN CITY, Bohol Sept 18 (PIA) –Sa mga Bol-a non nga nanimpad sa layo’ng lugar ug gi-uhaw sa balita kabahin ug gikan saBohol, mahimo na nga mosawod sa kasayuran ug kaugmaran sa yutang natawhan, dinhi sa matag adlaw nga dagayday sa www.boholbalita.com, ang bag-o nga online nga tubod sa Bohol Balita Daily News (BBDN).
Kini human gibuhi na ang online nga presensya sa BBDN diha sa www.boholbalita.com, gikan sa mantalaan nga nag-patungab sa mga Bol-anon sa mga kasayuran, kaugmaran ug katikaran, sa tanang suok sa lalawigan, sa adlaw nga tanan.
Matud pa ni Juanilo “Johnny” Orioque, sa makadaghan nan ga higayon, ilang gisuwayan ang pagpahimugso sa online ug inadlaw nga presensya sa BBDN, apan wala gyud kini molahutay tungod kay walay tawo nga nagtutok niini.
Karon, dala na usab sa pagtubag sa panginahanglan, gidugkaw na usab sa mga tagdumala sa BBDN aron ipabusagak ang mga balita nga karon, dili lamang igkita sa gipatik sa papel.
Congratulations BBDN, dayag sa pagbati ni Romeo Teruel, usa ka inila usab nga manunulat ug opisyal sa Kapitolyo.
Sa pagtapok sa mga manunulat atul sa pagbuhi sa website sa BBDN, gisaad ni Teruel nga mobalik siya og suwat og lindog, nga mabasa na sa online nga tambayanan sa BBDN.
Usa sa kasaligan nga han-ay sa mga editors, kauban na ang usa ka kasaligan nga administrator sa kapin sa usa ka gatus ka website, local ug international ang natahasan nga maoy mag-atiman sa online nga presensya sa papel, subay sa hugot nga mga batakan sa gawasnong ug undanon nga pagpadayag.
Hinuon, ang website, dili gayud ika-ambas sa linawas nga saysay nga masinati sa pagpakli-pakli sa papel samtang nagsubay sa mga nag-alintabo nga mga katikaran nga gihaon dihadiha, ug sa mga kulba-hinam nga serye nga daan nang kinaham sa katawhan diha sa Bohol Balita Daily News. (RAHC/PIA-7/Bohol)
