KANUNAY nga gilantaw ni Gob. Aris C Aumentado ang kahapsay ug kalinaw sa lalawigang Bol-anon diin mahinumduman nga nagpahigayon kini og peace and order council sa mga kadagkoan sa mga ahensya nga nagbantay sa kahapsay ug kalinaw.
Tungod niini niubos ang criminality rate sa lalawigan ngadto sa 34 porsiyento sugod kini sa buwan sa Hulyo ug Agosto.
Sigun ni P/Lt Col Joseph Berondo, deputy provincial director sa Bohol Provincial Police Office (BPPO) nga wala nay dinagko nga mga krimen ang natala sa PNP. Ug sumala usab ni Jayson Toreno nga maoy nag-representar sa mga kasundalohan sa 47th Infantry Batallion nga posibling madeklarang insurgency-free ang Bohol tungod kay base sa datus napulo nalang ang nahibilin sa walhon nga grupo nga matud pa huyang na kini kaayo nga makigbatok sa goberno.
Tungod sa adbokasya ni Aumentado, si Executive Assistance for Peace and Order, Art Evangelista atol sa usa ka interbiyo nibutyag nga gihan-ay niini pag-ayo ang mga ahensya nga maoy naglantaw sa kahapsay ug kalinaw aron mahimong smooth ang dagan sa matag operasyon. Ug diin bahin sa druga ang sugyot niini nga unang hatagan og unang pagtagad sa administrasyon tungod kay dako kining epekto sa kadaot labina sa mga batan-on.
Sa pagka-karon, padayon ang mga lakang nga gihimo sa kagamhanang probinsiyal aron makab-ot ang gitinguhang kahapsay ug kalinaw sa lalawigang Bol-anon. ( AND )
