USA ka Sangguniang Kabataan (SK) Chairman napalgang patay human giingong naghikog didto sa Purok 1-A, Brgy. San Juan, lungsod sa Sierra Bullones Miyerkoles sa alas 7 sa buntag.
Ang biktima giila nga si Samuel Galvinez y Tiongco, 23 anyos, ulitawo, lumolupyo sa susamang dapit.
Si PSSG Alberto Cabahug sa Sierra Bullones Municipal Police Station nagbutyag nga nadiskobrehan ang biktima sa usa ka Liza Ajoc, first degree cousin, nagbitay sa payag duol sa ilang pinuy-anan. Diin nigamit kini og nylon nga pisi nga gihikot sa liog ug ang tumoy gigaid sa babag nga kahoy sa atop.
Matud ni Cabahug nga sa wa pa mahitabo ang insidente, ang inahan sa biktima nga si Loreta Galvinez nibutyag sa kapolisan nga nakadawat kini og mensahe gikan sa biktima pinaagi sa messenger mga alas 2:56 sa sayong kabuntagon nianang adlawa nga nag-, ingon, ” I love you Ma and Pa, salamat sa tanan. Ayaw ko dugaya og haya. “
Dugang ni Cabahug nga sa pipila ka adlaw sa wa pa mahitabo ang insidente, giingong nibuhi og estorya ang nasampit nga biktima ngadto sa iyang pamilya ug mga amigo nga gikapoy na sa iyang pagka-SK chairman sa ilang lugar.
Padayon pang gisusi sa kapolisan ang maong hitabo. (ALAN ANDY NALZARO DALAGAN)
