CARMEN, Bohol — Ana-a na’y pampublikong kolehiyo ang sikat nga lungsod sa Carmen nga mao ang Carmen Municipal College (CMC), nga gikatakdang ablihan sunod tuig, matud sa inahan sa lungsod nga si Mayor Conchita “Che-che” Toribio Delos Reyes.
Ang maong bag-ong kalambuan gipahibawo sa usa ka Facebook post sa “Lungsod sa Carmen” – ang Official FB Account sa Buhatan sa Mayor kaniadtong Huwebes, Nobiyembre 17, 2022 atol sa induction ceremony sa CMC Interim Board of Trustees nga gihimo sa Chocolate Hills Complex.
“FINALLY! We are to open our Carmen Municipal College (CMC)!,” matud sa maong FB post.
Tinahud nga bisita si Gob. Aris Aumentado sa maong kalihukan isip inducting officer.
Niingon si Aumentado nga dako og ikatabang ang Edukasyon ngadto sa Kabatan-onan ilabina sa paglingkawas gikan sa kapobrehon sa usa ka pamilya.
“Every household should have a professional or professionals. Because having a professional in every family will result to a domino effect of success. Ang nakahuman nga anak, mutabang ug pa-eskwela sa manghod ug hangtod mahimo na nga professional ang tanan sa pamilya,” punto pa sa gobernador.
“Mao nay kalamboan natong tanan, ang paglambo sa matag pamilya sa atoang komunidad. So, this Carmen Municipal College is a great help especially to the people of Carmen. Ipaabot natos tanan, ilabi na sa mga kabatan-onan nga ang kapobrehon o dagan sa kinabuhi, mausab kini tungod sa Edukasyon,” panapos niini.
Si Mayor Che-che nidawat sa iyang dakong responsibilidad sa CMC isip Chairwoman sa ilang Interim BOT, samtang mapasalamaton sa legasiya nga gibilin sa iyang igsoon nga si kanhi Mayor Jun Toribio.
“Tinood, Edukasyon ang usa ka lig-on nga pondasyon sa kinabuhi ug sa kalampusan sa matag-tawo. As the Chairwoman, and Mayor of Carmen, I commit to support and direct the operation of our College. Also, we are grateful to Mayor Jun for starting this project and giving us the opportunity to make this into a reality. We pray that we can start our operation by next year,” matud sa mayor.
Si Vice Mayor Romeo C. Bigay Jr. nihatag usab sa iyang mensahe nga malaumon.
“Unta mahimong malampuson kining atoang College na gitukod sa Carmen. Sa giingon, ang laraw sa kasing-kasing ug dila sa tawo, ang tubag diha nanas Ginoo. Tinguhaon nato nga ang Ginoo maghatag ug kalampusan niining tanan.”
Ani-a ang mga naglangkub sa Carmen Municipal College Interim Board of Trustees:
Chairwoman: Hon. Conchita Toribio Delos Reyes (Municipal Mayor), V-Chairman: Hon. Romeo C. Bigay Jr. (Municipal Vice Mayor)
Mga miyembro:
Hon. Paolo V. Cajote (SB Comm. on Education), Atty. Eliezer J. Cagol Jr. (General Service Officer), Mrs. Susan P. Racoma (Municipal Treasurer), Ms. Carol Painagan-Madaje (SB Secretary), Mr. Dexter Chan (Municipal Accountant), Ms. Dulce A. Anino (Budget Officer), Mr. Jun B. Hermogenes (MPDC), Mr. Leo Gil Y. Rubia (MDRRMO) ug BOT Secretary: Mrs. Geraldine Lucañas.
Nitambong usab sa gihimong induction ceremony kinsa nihatag og orientation sa mga functions sa ilang Interim BOT si College Consultant, Dr. Pedro C. Fudolig ug Board Member Nathaniel Binlod kinsa maoy niabli sa induction.
Ang maong nindot nga kalambuan gikalipay sa katawhan sa Carmen ilabina ang ilang ubang mga estudyante sa kolehiyo tua nagtungha sa nagkalain-laing kolehiyo ug unibersidad, sulod ug gawas sa Bohol.
Ang pagkatukod usab sa maong kolehiyo dugang kalambuan sa ekonomiya sa nailang lungsod sa tibuok kalibutan tungod sa Chocolate Hills.
