PATAY ang usa ka Danish national kinsa giingong nakatagay human aksidenteng nibangga ang motorsiklo nga gimanehoan niini sa duha ka poste sa korente kilid sa nasudnong dalan didto sa Purok-6, Barangay Songculan, lungsod sa Dauis niadtong Dominggo mga 1:50 sa sayong kabuntagon.
Ang biktima giila nga si Soren Paulsen, 41 anyos, ulitawo, lumad sa Denmark temporaryong nagpuyo sa Brgy. Doljo, Panglao.
Sigun sa pakisusi sa kapolisan nga ang biktima luwan sa usa ka Kawasaki Ninja 500 cc nga motorsiklo gikan nag-inom sa usa ka bar sa siyudad sa Tagbilaran kuyog sa iyang uyab nga nagsakay og laing motorsiklo padung na untang mouli. Dihang pag-abot sa kurbadahon nga porsiyon sa maong dapit, nawad-an og kontrol gumikan sa kakusog sa dinaganan niini hinungdan nga nibangga sa duha ka mga poste sa poste sa korente ug napasok ang motorsiklo sa tunga sa duha ka mga poste.
“Matud sa íyang uyab nga nakakita, mura’g nakurat o nakatadpilaw, niditso, wala na kaliko sa curve hinungdan nga nibangga sa concrete nga electric post, ” butyag ni PSSg Allan Calcabin sa Dauis Municipal Police Station.
Matud ni Calcabin nga nahiagom ang maong biktima og grabeng mga angol sa iyang kalawasan ug nabali ang toong tiil niini.
Wa usab magsuot og helmet ang nasampit nga langyaw.
