Gipalig-on ni Gobernador Aris Aumentado ang Gatas Bol’anon Program sa lungsod sa Mabini ilabi na sa Sitio Pasto, Barangay San Isidro, pinaagi sa pagdala sa serbisyo sa panghayopan ug pag apod-apod sa ekipo sa mga dairy farmers atol sa gihimong CIVAC nga gidumala sa LGU-Mabini.
Si Gobernador Aris Aumentado inubanan ni Dr. Bing Lapiz mitunol sa 2 ka Bio-shredder, 20 ka gallon molasses, 100 ka silage bags, ug 200 ka indigofera seedlings.
Ang PLGU-Bohol pinaagi sa Office of the Provincial Veterinarian nakahatag og konsultasyon sa 58 ka mga mag-uuma ug nakaserbisyo sa pagpurga, bitamina ug Artificial Insemination sa 65 ka kabaw, 21 ka baka, ug 1 ka kanding.
Sa industriya sa panggatasan, ang Sitio Pasto ika pasigarbo tungod sa kadaghan sa misalmot sa pagpangatas , gani adunay 25 ka mga kabaw nga kasamtangan gikuhaan og gatas, bisan pa og ang maong sitio atua mahimutang sa kabukiran sa barangay San Isidro.
Mas modako na ang kinita-an sa panggatas human gisaka-an sa BODACO ang buying price sa raw milk ngadto sa 70.00 kada litro. (PT/OPV)
