NAANGOL ang bag-ong na promote nga hepe sa kapolisan sa lungsod sa Sagbayan human ang awto nga iyang gimanehoan , aksidenteng nibangga sa poste sa korente sa Sagbayan- Catigbian National Road didto sa Barangay Ubojan, lungsod sa Sagbayan mga 11:40 sa buntag kagahapon, Enero 10.
Si PCPL Gino Padilla sa Sagbayan Police nga nahinabi sa BBDN, nagbutyag nga samtang si Police Captain Eric Binangbang nagmaneho sa iyang Hyundai Accent kolor gray nga awto, nagdagan gikan sa Kampo Dagohoy sa siyudad sa Tagbilaran padung sa ílang buhatan. Dihang pag-abot sa maong dapit, giingong nakatadpilaw hinungdan nga nakabig padung sa walang bahin sa karsada ang iyang sakyanan ug aksidenteng nibangga sa poste sa korente.
Si Binangbang, 41 anyos, minyo, taga Brgy. Poblacion, lungsod sa Danao, gikan kini nitambong sa oath-taking ceremony sa Bohol Provincial Police Office headquarters sa Kampo Dagohoy. Diin siya na promote gikan sa lieutenant ngadto sa captain.
“Nakatadpilaw kay nitambong og vigil sa iyang uyoan anang pagkagabii ug sayo siya nimata kay alas 4 sa buntag miadto sa Kampo Dagohoy, ” butyag ni Padilla.
Nahiagom si Binangbang og mga angol sa tuhod ug sa kilid sa lawas ug gidala sa Coop Hospital sa siyudad.
Dugang ni Padilla nga luwas na sa iyang kahimtang ang nasampit nga police official. (ALAN ANDY NALZARO DALAGAN)
