GRABENG hingsamdan ang usa ka lalaki human giingong gipusil sa uyab sa kapuyo niini didto sa Barangay Mayacabac, lungsod sa Dauis nga alas 8:00 sa gabii niadtong Huwebes.
Ang biktima giila nga si Michael Casquejo, 30 anyos, lumad nga lumolupyo sa maong dapit.
Ang suspetsado nailhan nga si Nicomedes Manatad Bulabos Jr., 42 anyos, usa ka security guard sa Justicor market, taga Brgy. Poblacion, Pres. Carlos Garcia o Pitogo.
Base sa imbestigasyon nga ang biktima ug ang kapuyo niini nga si Michelle Dulaota, 26, nag-away hinungdan nga nanawag si Dulaotaug nagpatabang sa iyang uyab nga si Bulabos ug niadto kini sa maong dapit.
Wala nakabantay sila Dulaota ug Bulabos nga giatangan sila ni Casquejo ug didto nagsinukloiay og mahait nga mga pulong ug kinomo.
Naigo si Bulabos sa bunal ni Casquejo sa agtang niini hinungdan sa pagkasamad.
Apan giingong gipusil ni Bulabos si Casquejo gamit ang iyang kalibre .38 ug naigo sa dughan niini.
Pulos nalandig sa Gov. Celestino Gallares Memorial Hospital.
Gidakop ang maong suspek sa kapolisan pinangulohan ni PLT Thomas Zen Cheung, Hepe sa Dauis Police Station ug SWAT Team sa Tagbilaran City Police Station.
Giandam na ang kasong Frustrated Murder batok sa nasampit nga suspek kinsa nabawian usab og kalibre .38 revolver ug usa ka kutsilyo. ( ALAN ANDY NALZARO DALAGAN )
