DAUIS – Usa ka 64 anyos nga byudo ang nasikwate sa kapolisan alas 12:30 ganihang udto (Sabado Nobyembre 19) sa gihimong buy-bust operation sa Purok 6B, barangay Bingag ning lungsod.
Ang suspect nailhan nga usa ka Inocencio Bondalo Jr. y Cloribel alias Kulot, taga Purok 4, Barangay Taloto, dakbayan sa Tagbilaran.
Nagmalumposon ang gipahigayon nga buy-bust nga pinangulohan ni Lt. Yolando Bagotchay Jr. Ubos sa superbisyon ni Lt. Col. Joemar Pomarejos ug inabagan sa RSOG-RPDEU7 Bohol ug sa Dauis PNP.
Ang suspetsado nagsakay sa iyang Mitsubishi Adventure nga may plaka VFT 195.
Nagmalampuson ang buy-bust sa dihang napalitan ug nakuhaan gikan sa iyang posisyon sa pinutos nga gidudahang shabu nga gibana-bana nga motimbang ngadto sa lima ka gramos ug mokantidad og P34,000.
Nasayran nga ang suspetsado kanhiay na nga nasikop gumikan gihapon sa pagkahilambigit sa pagpamaligya og shabu niadtong tuig 2015. Nakagawas kini human usab nagpahimus sa plea bargaining agreement.
Kasamtangan nga gibilanggo sa Dauis PNP lock-up jail samtang giandam ang kaso nga ipasaka batok kaniya sa paglapas sa Section 5, Section 11 sa Article 2 sa Republic Act 9165 kon ang Comprehensive Dangerous Drugs Act of 2002. (ERN RAMA PAHAYAHAY)
