“Aling pag-ibig pa ang hihigit kaya sa pagkadalisay at pagkadakila gaya ng pag-ibig sa tinubuang lupa? Aling pag-ibig pa? Wala na nga. Wala,” matud pa ni Andres Bonifacio.
Gihandum ug giselebrar kanatong katawhang Pilipinhon karong adlawa ang ika-159 nga adlaw’ng natawhan sa giilang “Supremo nga Katipunan” nga si Bonifacio.
Nganong Nobiyembre 30 man ang gihandum isip paghatag og dungog ni Bonifacio? Kini kay kontrobersyal ang iyang kamatayon sa mga kamot sa iyang mga kaubang rebolusyonaryo sa sugo ni Heneral Emelio Aguinaldo. Gipahamtangan og silot si Bonifacio tungod sa salang “treason” ug “sedition” ug gipatay kaniadtong Mayo 10, 1897 sa Bukid Buntis sa Maragondon, Cavite.
Kaniadtong Pebrero 16, 1921, nihimo sa Akta Reublika 2946 ang Philippine Legislature aron himuong “legal holiday” ang matag Nobiyembre 30 kada tuig isip paghandum ni Bonifacio ug sa iyang dakong kontribusyon sa kagawasan sa Pilipinas sa kamot sa mga Katsila.
Apan ana-a pa ba’y Bonifacio karong panahona? Maihap ra. Kay mismo ang atong gobyerno niangkon nga walay ikabuga sa China sa pagdepensa sa West Philippine Sea.
Grabe ang gugma ni Bonifacio sa iyang yutang natawhan — ang nasud Pilipinhon, ug kini iyang gipakita sa buhat ug sa pulong pinaagi sa iyang tula nga “Pag-ibig sa Tinubuang Lupa.”
Ang damgo nga makalingkawas sa pait nga kasinatian sa mga Pinoy gikan sa kamot sa mga Katsila maoy nagduslit sa kasing-kasing ni Bonifacio ug sa mga Katipunero aron moasdang sa mga kaaway. Dugo ug kinabuhi ang ilang puhunan nganong kita karon nagsadya sa atong kagawasan.
Dako usab og papel ang mga nobela ni Jose Rizal nga Noli Me Tangere ug El Filibusterismo sa pagkamata sa nahitulog nga kaisog sa mga Pinoy, nga maoy sinugdanan sa Rebolusyon.
Atong ipakita ang atong gugma sa nasud Pilipinhon ug sa mga Pinoy diha sa pagpanalipod sa mga interes niini.
Walay lugar ang pagdaug-daug kon walay magpadaug-daug. Makigbatok kita sa limpyo ug patas nga pang-gobyerno alang sa katawhang Pilipinhon ilabina kanatong mga Bol-anon.
Ang kagawasan ug ang lakang paingon sa hinlo ug dayag nga pang-gobyerno dili sayon — nagkinahanglan kini og oras, kaisog lakip na ang kinabuhi kon magkinaunsa. Mao kana ang kahulugan sa gugma sa nasud ug sa katawhan.
Imong mapanalipdan ang katawhan ug ang nasud kon ikaw magpakabana ug dili mahadlok sama ni Bonifacio.
