Kon daghan ka og higala, daghan usab ang mamahimong mo-suporta nimo sa imong mga plano.
Sa pamolitika ug pang-gobyerno, mao usab ang nawong. Kon daghan ka’g amigo nga mga lider sa gobyerno, daghan ka og maduolan.
Kon ikaw politiko, kinahanglan daghan ka og amigo nga mga politiko nga ana-a sa taas.
Mao kini ang gibuhat sa ubang politiko bisan lahi og mga partido.
Ang uban pa gani, mokuyog sa laing partido kay ana-a ang pabor nga gipangita. Makigplinastikay na lang. Puwera sa mga maayo ug sinsero ang katuyoan.
Dinhi sa Bohol, si Gob. Aris Aumentado daghan usab og amigo o amiga sa kaulohan nga mga politiko.
Kay kon ikaw usa ka lider sa katawhan, kinahanglan daghan ka og amigo nga mga politiko usab aron anaay kaduolan — panahon man sa katalagman o alang sa kaayuhan sa imong lungsod, distrito o probinsya.
Tungod kay ang anak nga Aumentado ilado ng daan sa Kongreso ug karon maoy amahan sa lalawigang Bol-anon, daghang mga dagkong negosyante ang niduol kaniya kay gustong mamuhunan dinhi.
Si Aris naila isip kusog makig-amigo bisan sa mga giilang ana-a sa oposisyon.
Ug duha lang ang lagmit sigurado: iya kining kinaiya o iyang istratehiya, alang sa katawhan ug sa iyang karera sa politika.
