Usa ra ang atong kinabuhi ug angay gayud ampingan ilabina kon anaay mga maayong tumong ug tinguha niining kalibutana.
Nagsunod-sunod ang mga disgrasya sa kadalanan karong buwana, kondili man Ceres bus ang nakadisgrasya, maoy gidasmagan.
Ang kasagaran mao ang binanggaay sa mga motorsiklo ug ang uban nakabangga og mga inosenteng tawo ug mga batan-on.
Subo pamalandungon nga imbes Pasko, anaay mga pamilyang nagbangutan, apan dili na man mabalik ang mga kinabuhi nga nasayang.
Anaay mga nadisgrasya usab tungod kay nakaligis og iro. Ug ang kasagaran, tungod kay lango sa ilimnong makahubog.
Sayang ang maong mga kinabuhi nga nahanaw sa dili pa unta saktong oras ug panahon.
Moingon ang uban nga “Mao ra pud ang ilang kutob. Niabot na ang ilang oras.”
Apan lage, mas maayo nga mag-amping inubanan sa pag-ampo. Mag-amping gayud ilabina kon anaay gibuhi nga pamilya.
Unta, maghinay-hinay sa pagpadagan ang atong mga kaigsoonan ilabina ang mga batan-on aron makalikay sa disgrasya ilabina kadtong mga duha ra’y ligid nga maoy mas duol sa aksidente.
Kinahanglan usab ang interaksyon sa mga ana-a sa otoridad aron madisiplina ang mga abusadong drayber.
