TULO ka mga tawo ang nangaangol human ang ílang gisakyang motorsiklo aksidenteng na-kras human milikay sa mi-u-turn nga multicab sa nasudnong dalan didto sa Brgy. Cambuac Sur, lungsod sa Sikatuna mga alas 9:56 sa buntag kagahapon, Nob. 28.
Ang mga biktima giila nga sila si Mark Christian Indoyon y Barrete, 20 anyos, ulitawo, drayber sa motorsikllo, usa ka dizer sa supermarket, ug mga backrider nga si Presciliana Indoyon y Barrete, 60, minyo , inahan sa maong drayber ug igsuon nga si Jana Mae Indoyon y Barrete, 22, dalaga, pulos taga Brgy. Ubujan, siyudad sa Tagbilaran.
Sigun ni PSSg Julian Leparto sa Sikatuna Municipal Police Station nga samtang ang mga biktima luwan sa usa ka Suzuki Raider 150 kolor itom, may plate number 550 KYJ, nagdagan gikan sa lungsod sa Loboc padung sa direksiyon sa siyudad sa Tagbilaran. Dihang pag-abot sa maong dapit duol sa intersection, may multicab nga ning-u- turn, hinungdan nga kalit ni-brake si Indoyon ug milikay. Apan nawad-an hinuon sa kontrol.
“Nakurat ni siya (Indoyon), niaplay og brake ug milikay, natumba kay nawad-an og kontrol, ” butyag ni Leparto.
Ang inahan sa maong drayber nahiagom og samad sa nawong samtang ang duha nakaangkon lamang og minor nga mga angol.
Gidala ang biktima sa Gov. Celestino Gallares Memorial Hospital sa siyudad sa Tagbilaran. (ALAN ANDY NALZARO DALAGAN)
