PATAY ang usa ka batan-ong seaman human giingong aksidenteng na kras sa gimanehoang motorsiklo dihang nakaligis og gamay’ng bato duol sa sementeryo didto sa Barangay Bagacay, lungsod sa Talibon pasado alas 5:00 sa hapon niadtong Bernes.
Ang biktima giila nga si Jester Tugo, 24 anyos, lumad nga lumolupyo sa maong lugar.
Sigun sa tagtungod sa biktima nasayran nga samtang luwan kini sa usa ka motorsiklo gikan niduaw sa iyang mga paryenti sa Brgy. San Francisco, Talibon. Ug nagdagan padung na untang mouli, dihang pag-abot sa likoon nga bahin sa maong dapit, wa kini nakabantay nga naay bato nga gamay pa sa kumo hinungdan nga aksidenteng na-kras ug napantok ang ulo niini sa karsada.
Daling gihatud ang biktima sa Garcia Memorial Provincial Hospital lungsod sa Talibon, ug gumikan sa katalandugon sa iyang kahimtang, gibalhin sa Gov. Celestino Gallares Memorial Hospital sa siyudad sa Tagbilaran. Apan nabugtoan sa iyang kinabuhi niadtong Lunes sa hapon. ( ALAN ANDY NALZARO DALAGAN )
