Sa dagan sa panghitabo karon sa Bohol ilabina sa Kapitolyo, hayag nga kaugmaon ang nagpaabot sa mga Bol-anon.
Kini tungod kay nakabaton ang mga Bol-anon og sinsero, seryoso o tarong nga lider diha sa pagkatawo ni Gob. Aris Aumentado.
Ang pagkatukod sa OGAR, ang pagdagsa sa mga dagkong magpapatigayon ug ang nabanhaw nga turismo, maoy dakong puntos ni Aris sa mga mata sa katawhang Bol-anon.
Ang panudlanan sa lalawigan nagsukod na og kadako ilabina ang koleksyon o bahin sa probinsya gikan sa mga quarry operators.
Nahatagan ni Aumentado og hustisya ang gialegar nga nagbaha korapsyon sa niaging administrasyon. Nasugdan na kini niya og papha sa iyang pamunoan pinaagi sa OGAR.
Taliwala sa mga pagbiay-biay ug nagpadayong pagsaway gikan sa iyang mga kritiko o kaatbang sa politika, mas nagkanindot pa hinuon og ayo ang “performance” sa anak nga Aumentado.
Gihimong kusog ug inspirasyon ni Aris ang mga pagsaway ilabina sa Segundo Distrito nga gihulagway nga pinakapobre ug pinakaluoy nga distrito sa Bohol.
Ang nakapabor, kay iyang katambayayong karon ang iyang hamiling kapikas nga si Segundo Distrito Kongresista Van-van Aumentado sa pagpalambo og ayo sa mga kalungsuran nga nasakop niini.
Ang mga pagsaway walay luna kon padayong magmalampuson ang mga lakang sa batan-ong gobernador.
Usa lang ang gipamatud-an ni Aris dili lang sa Segundo Distrito nga iyang gialagaran og 9 ka tuig, kondili ang tibuok Bohol: tinuod siya nga lider, lider nga anaay agi ug ikapasigarbo inig abot sa panahon.
