TAGBILARAN CITY, Bohol, September 19 (PIA)–Nanawagan ang National Telecommunications Commission (NTC) sa publiko nga isumbong sa ilang buhatan ang mga nadawat nilang gidudahang text scams.
Kini human gilusad sa NTC ang ilang text scam complaint page dungan sa pahibalo diin gitambagan sa buhatan ang publiko nga sundon ang mga mosunod nga mga lakang:
IDENTIFY A TEXT SCAM
– Kun makadawat og text message gikan sa wala nailhing numero ug nagtanyag og trabaho, premyo o ganti, discounts ug uban pa nga adunay clickable weblink, kini usa ka text scam message.
IGNORE
– Kun ang madawat nga mensahe kadudahan, ayaw kini tagda, ayaw reply ug ayaw e-click ang weblink.
REPORT
– Kuhai og screenshot ang mensaheng nadawat nga makita ang numero sa sender ug e-report sa NTC.
BLOCK AND DELETE
– Sa higayong ma-report na sa NTC, e-block dayon ang numero ug e-delete ang scam message.
Alang sa e-report sa NTC sa nadawat nga text scam, mahimo kining ipadala sa e-mail address nga konratextscam@ntc.gov.ph.
Iapil sa email ang pangalan, address, email ug contact number sa nagreklamo, gireklamong cellphone number, screenshot sa nadawat nga text scam ug litrato sa bisan unsang government-issued IDs.
Gawas niini, mahimo usab e-upload sa website sa NTC nga https://ntc.gov.ph.
E-click lamang ang “Text Scam Complaints” button, tubagon ang Text Scam Complaints Form ug i-click ang “submit” button.
Ang step-by-step guide sa pagsumite sa text scam complaint makita sa website sa NTC nga https://ntc.gov.ph. (ecb/PIA7-Bohol)
