ini maoy dakong problema sa ubang kalungsuran dili lang sa Bohol apan sa ubang parte usab sa Pilipinas.
Daghang mga pinili sa katawhan nga kaugalingong kabulahanan o interes ra gihapon ang gihunahuna bisan napili na o humana ang eleksyon.
Ang ma-alkanse o alkanse gayud kanunay kon ingana ang pangutok sa mga lider nga naglingkod, mao ang katawhan.
Ang ubang mga politiko mo-rason pa nga, “Ma-molitika gayud kay politiko g’yud mi.”
Muot hunahunaon nga pungot nga kana ang nisantup sa ilang alimpatakan ug maoy singgit sa ilang dughan.
Ang mga lider nga nagtan-aw kanunay sa kaayuhan sa katawhan ug sa barangay man, lungsod, distrito o probinsya, rehiyon o sa tibuok nasud, magtarong kanunay sa ilang pagpangalagad.
Ang mga maayong kalambuan ug mga umaabot pa nga grasya sa Bohol bunga sa pagkabaton og kasaligan ug tarong nga mga lider.
Diha nato makita nga kon pili-on lang kanunay sa katawhan ang mga kandidato nga nahigugma sa katawhan ug sa lugar nga ilang serbisyuhan, hanoy kanunay ang pag-abante.
Ug seryosong pahinumdom: ang imong maayong pagdumala usa na ka matang sa pagpangampanya sa kasing-kasing ug sa mata sa katawhan. Ang kahigayonan na ang moduwa alang sa hayag nimong karera sa politika.
